Rreth një muaj nga grabitja e Rinasit janë publikuar për herë të parë disa pamje brenda pistës së aeroportit “Nënë Tereza”, gjatë supergrabitjes së rreth 6 mln eurove mesditën e 9 prillit.
Nga pamjet e kamerave të sigurisë duket që fugoni me mbishkrimin “ hetimi tatimor ” pasi shpërthen derën e zjarrfikëseve, vazhdon rrugën në pistë i pashqetësuar nga askush.
Për të shmangur kontaktin me pasagjerët dhe patrullat e ICTS-së , fugoni i grabitësve kalon nga pas avionëve të parkuar për të mbërritur tek avioni ku po imbarkoheshin paratë drejt Vjenës, i cili ishte i fundit në radhë.
Në pamje duken mjetet e kompanisë private për sigurinë e aeroportit që lëvizin në drejtim të kundërt me grabitësit ndërsa nga hetimi ka rezultuar se strukturat e policisë kufitare rinas, janë vënë në dijeni të paktën 5 minuta me vonesë pas çarjes së rrethimit.
Në këtë moment një furgon i policisë së Rinasit me disa efektivë reagon menjëherë duke shkuar në drejtim të itinerarit të grabitësve por këta të fundit kishin dalë nga pista nga një portë tjetër fundore emergjence e aeroportit.
Gati një muaj pas supergrabitjes së Rinasit 6 persona janë vënë në pranga , 5 të tjerë janë shpallur në kërkim ndërsa një nga krerët e dyshuar të grupit Admir Murataj mbeti i vrarë gjatë shkëmbimit të zjarrit me forcat e ndërhyrjes së shpejtë.
Krahas zbulimit të autorëve hetimet pritet të nxjerrin në pah edhe përgjegjësinë e koncesionarit dhe kompanisë për sigurinë brenda rrethimit ndërsa pas ngjarjes aeroporti u mor në kontroll nga policia e shtetit dhe forcat e ushtrisë të cilat vijojnë të ruajnë rrethimin e jashtëm./ Vizion Plus
