Me shpalljen e listave për kandidatët e 12 qarqeve nga Partia Demokratike, kanë nisur pakënaqësitë e para në disa qarqe.
Blendi Himçi, një prej figurave më të spikatura të qarkut të Elbasanit, ka njoftuar tërheqjen nga gara në formë proteste lidhur me renditjen e tij në listat e kandidatëve.
Mirëpo, menjëherë pas bërjes publike të këtij lajmi, Himçi duket se është penduar dhe ka vendosur ti rikthehet garës.
Nga ana tjetër, në pamundësi për të kontaktuar me kandidatin e Elbasanit, Tirana Today në një bisedë telefonike me Luçiano Boçin ka arritur të mësojë të vërtetën e kësaj deklarate.
Sipas Boçit, Himçi ka pasur një revoltim momenti por është rikthyer në garë.
Kujtojmë se para deklaratës së kandidatit për deputet në qarkun e Elbasanit, kryetari i Partisë së Gjelbër, Sazan Guri është dorëhequr nga listat e PD-së në qarkun e Beratit duke akuzuar këtë parti si “parti biznes”.
Deklarata e Himçit
“E cila paska qenë kjo sakrificë madhore? Paskemi luftuar për të përfshirë në lista njerëz që nuk kanë asnjë lidhje me qarkun e Elbasanit, por vetem pse janë beniaminë të kryetarit Basha.”
Blendi Himçi është në vendin e tetë të listës për kandidatë të PD-së në Elbasan.
1.Edmond Spaho
2.Endri Hasa
3.Luciano Boci
4.Taulant Zeneli
5.Arben Elezi
6.Fitim Zekthi
7.Nada Krypa
8.Blendi Himçi
