Mesut Ozil duket se nuk i kalon inati me Gjermaninë dhe këtë e ka vërtetuar me veprimin që ka bërë pas ceremonisë që është mbajtur në Londër nga FIFA ku Luka Modric u shpall futbollisti më i mirë i vitit. Ka qenë trajneri i kombëtares gjermane, Joachim Low i cili pas ceremonisë vendosi të bëjë një vizitë në qendrën stërvitore të Arsenal.
Trajneri donte të takonte personalisht ish-lojtarin e kombëtares gjermane, Ozil, por atij iu refuzua hyrja. Lajmi në fjalë është zbuluar nga gazeta gjermane “Bild”, ndërkohë që bëhet e ditur se ai ishte së bashku me menaxherin e kombëtares, Oliver Bierhoff.
Gazeta shkruan se ata kishin njoftuar lojtarët gjerman të Arsenal për vizitën, si edhe konsulentin e Ozil, por ishte vetë Mesut që refuzoi ta takonte. Gjithashtu bëhet e ditur se trajneri ka tentuar shpesh të telefonojë Ozil, por ai nuk është përgjigjur asnjëherë.
Kujtojmë se Mesut Ozil u tërhoq nga kombëtarja gjermane pas presioneve politike mbi një foto të tij me Presidentin turk Erdogan.
