Katër turistë nga Suedia dhe Finlanda konsiderohen ende të zhdukur, pas një orteku të borës që ra të mërkurën në pjesën e Arktikut të Norvegjisë.
Lajmi u bë i ditur nga policia norvegjeze, ndërsa tha se kërkimi nga ekipet e shpëtimit është thuajse i pamundur për shkak të kushteve të motit.
“Masa e borës është e madhe. Ekziston një rrezik i madh për një ortek të ri dhe në këtë zonë ka një stuhi të vogël”, tha shefi i policisë së Tromse, Astrid Elisabeth Nilsen në një konferencë shtypi.
Gjurmë të skijimit janë vërejtur në drejtim të ortekëve, por jo edhe jashtë tij. Policia dyshon se katër skiatorët janë zënë nga orteku.
