Një ditë më parë, opozita jashtëparlamentare pranoi marrëveshjen me qeverinë për Reformën Zgjedhore. Kjo marrëveshje i dha fund odisesë së tejzgjatur për këtë reformë duke u finalizuar me sukses.
Marrëveshja u firmos nga Damian Gjiknuri i cili përfaqëson mazhorancën dhe dy përfaqësuesit e opozitës Oerd Bylykbashkin e PD dhe Petrit Vasilin e LSI.
Edhe pse ishte e pranishme në këtë tryeze, deputetja e opozitës në Parlament, Rudina Hajdari nuk pranoi që të hidhte firmën e saj, duke dalë kundër kësaj reforme.
Sipas arsyetimit të Hajdarit, përpara se të pranonte këtë marrëveshje duhet konsultimi me deputetët e opozitës që janë në Kuvend.
Por duket se deputetët e Kuvendit të pozicionuar në opozitë, janë kundër kësaj reforme, pasi kanë kërkuar që të përfshihet në të edhe puna që është bërë në vitin 2019 nga Komisioni i Posaçëm i Reformës Zgjedhore.
Sipas deputetit Korab Lita, anashkalimi i saj do të sillte nxjerrjen jashtë loje të propozimeve të tyre, si ndryshimi i sistemit zgjedhor.
“Ne parimisht e diskutuam draftin dhe kundërshtojmë paragrafin numër 4, ku nuk përfshihet te objekti i punës ajo që kemi bërë në vitin 2019”, tha deputeti Lita.
“Nuk duam vetëm arnime në kodin zgjedhor. Absolutisht që i mbështesim, por nuk është e mjaftueshme”, tha deputeti tjetër, Arben Elezi.
Ndërkohë, Alban Zeneli paralajmëroi se votat e opozitës parlamentare nuk janë të garantuara.
“Duhet t’ia heqim monopolin kryetarëve të partive, aq shumë të mirëpritur nga qytetarët shqiptarë. Në çdo rast tjetër, unë, por jam i bindur edhe kolegët e mi, nuk do të japim votën për arnime. Sidomos kur vijnë nga tryeza jo institucionale, siç ishte rasti i fundit”, tha ai.
