Kreu i KLP, Gent Ibrahimi, shpreson që Kuvendi ta votojë kandidatin e parë në listën për kryeprokuror, Olsian Çelën. Ai ka thënë se vlerësimi ka qenë profesional dhe aritmetikor, ku secili anëtar ka shprehur vullnetin e tij.
“Vlerësimi ka qenë profesional dhe aritmetikor. Secili anëtar shprehu vullnetin e tij. Shpresoj se nuk do të kemi ankimim.
Ankimimi mund të bëhet brenda 3 ditëve. Besoj se nuk do të kemi probleme. Ky proces, shembull. Uroj që Kuvendi të mos e zvarrisë. Të merret parasysh pozicioni, dhe të votohet kandidati që ne renditëm të parin.
Unë nuk di si kanë votuar, ata kanë të drejtën ligjore për të votuar siç mendojnë ata. Jam në mëdyshje nëse duhet bërë lista publike për mënyrën e votimit.
Mendoj që ka të mira dhe të këqija në publikimin e votimit. Vendimi do merret nga Këshilli. Kjo s’është çështje dëshire, ligji parashtron që Kuvendi e zgjedh.
Ligji merret parasysh, do bashkëpunojmë me këdo. Të tre janë kandidatë të vlefshëm. Ju na e bëni të lehtë, ne po zgjedhim një prokuror të mirë. Urojmë që Kuvendi të marrë parasysh zgjedhjen tonë, sepse ne i verifikuam profesionalisht. Parlamenti ka marshin e tij politik”.
Pas seancës së djeshme dëgjimore, KLP ka renditur Olsian Çelën të parin në listën që do i dërgohet Parlamentit për votim. Arta Marku renditet e dyta, dhe e treta Fatjona Memçaj.
Një ditë më parë, ata paraqiten platformat e tyre, dhe më pas iu përgjigjen pyetjeve të anëtarëve të KLP për çështje të ndryshme. Për menaxhimin e punës në Prokurorinë e Përgjithshme.
Kandidatët u pyetën edhe nga përfaqësues ndërkombëtarë. Lista me renditjen e kandidatëve, do t’i dërgohet për votim Kuvendit.
Në rast se asnjë kandidat nuk merr 84 vota, atëherë automatikisht Prokuror i Përgjithshëm do të zgjidhet ai që është renditur i pari.
