Edhe pse ka marrë rol drejtues tek Partizani pak javë më parë, në ditën e sotme Olsi Rama ka qenë i pranishëm në ceremoninë e diplomimit të drejtorëve sportivë, që u zyrtarizuan si njerëzit e menaxhimit të klubeve shqiptare nga FSHF-ja. Tashmë vëllai i kryeministrit është zyrtarisht pjesë e sistemit drejtues dhe këtë e pohon edhe vetë ai. Ndërsa sa i përket situatës tek Partizani, Olsi Rama, është shprehur se Starova do të jetë në pankinë edhe për ndeshjen me Vllazninë dhe vendimi i drejtuesve ishte që tu tregojë lojtarëve se janë ata që vendosin fatin e trajnerëve jo lojtarët. Po ashtu ai mohoi se do të ketë largime nga ekipi në merkaton e janarit.
“Kjo është liçensa, zyrtarizimi është bërë që më përpara si drejtor te Partizani. Rikthimi i Starovës pas dorëheqjes? Ishte vendimi i të gjithë drejtuesve për të krijuar vazhdimësi të punës. Ishte një sinjal për t’i treguar skuadrës se ka një plan dhe fatin e trajnerëve e vendosin drejtuesit.
Starova ka qenë përherë pjesë e klubit dhe do të jetë në krye të stolit edhe për ndeshjen me Vllazninë. Merkatoja e dimrit? Nuk do të largohet asnjeri. Merkatoja bëhet për t’u përmirësuar. Senatorët do të vijojnë të jenë pjesë e Partizanit. Merkatoja e janarit është merkato riparimesh. Titulli që kërkojmë? Unë e thashë që kemi bërë një kërkesë, për të qenë brenda afateve ligjore, për të njohur të drejtën e Partizanit. Ne presim vendimin e KAS-it, nuk ka asnjë problem. Pozicioni i Moxhit? Ai do të vazhdojë të jetë pjesë e Partizanit dhe emërimi im nuk e përjashton atë”.
