Stomatologia e njohur tashmë si super-mashtruese, e cila akuzohet se ka përvetësuar më shumë se 900 mijë euro, ka dalë sot para gjykatës nën akuzën e mashtrimit.
38-vjeçarja ka mohuar çdo akuzë, madje ka kërkuar që të hetohet në gjendje të lirë dhe të mund të mbledhë provat e saj që nuk është mashtruese.
Jo vetëm kaq, por Duka pretendon se biznesmeni Idlir Hoxha dhe i vëllai i tij e kanë gjobitur.
“Dua të hetohem në gjendje të lirë dhe të vërtetoj që nuk jam mashtruese. Më lini kohë që të paraqes provat e mia, pasi e gjithë kjo më ka shkatërruar karrierën dhe imazhin. Çdo detyrim e kam bërë me bankë, e jo me çantë. Idlir Hoxha dhe i vëllai më kanë vënë gjobë. Më kanë bërë presion në qershor 2017, pasi bëra një festë për fëmijët në bashkëpunim me Vangjush Dakon. Të zbardhet e gjithë historia dhe pse unë i mora”, deklaroi ajo.
Por pavarësisht kësaj, gjykata vendosi masën e sigurisë “arrest ne burg”. Duka akuzohet se i ka marrë një biznesmeni shumën prej 900 mijë eurosh përmes gënjeshtrës dhe shpërdorimit të besimit.
Sipas prokurorisë, kallëzuesi, i cili është pronar i një zyre këmbimi valutor dhe agjencie udhëtimi është njohur me stomatologen në nëntor të vitit 2016. Prokuroria thotë se 38-vjeçarja i ka kërkuar fillimisht një shumë të vogël për të blerë pajisje denature, duke u treguar korrekte në fillim në kthimin në kohë të shumave të marra, por më pas ka kërkuar më shumë para, derisa ka shkaktuar në total një dëm prej 900 mijë eurosh.
Pas akuzës së parë, në policinë e Tiranës kanë mbërritur disa denoncime të tjera ndaj Dukës, me akuzën e mashtrimit.
