Organizata Botërore e Shëndetësisë ka dhënë alarmin për sa i përket antibiotikëve, duke paralajmëruar një mungesë të tyre në të gjithë botën.
Kështu, sipas njoftimit të OBSH-së, kanë mbetur shumë pak antibiotikë për trajtimin e krizës globale të rezistencës së ilaçeve, përgjegjëse për shtimin e infeksioneve thuajse të patrajtueshme në të gjithë botën.
Sëmundja që po përhapet me shpejtësi është tuberkulozi, i cili është rezistent ndaj shumë ilaçeve dhe që kërkon trajtime që zgjasin 9-20 muaj.
Si pasojë e rezistencës së kësaj sëmundjeje ndaj shumë ilaçeve, ndodhin rreth 250 mijë vdekje në vit dhe vetëm 52% e pacientëve në të gjithë botën arrijnë të trajtohen me sukses.
Pavarësisht kësaj, në 70 vite janë nxjerrë në treg vetëm 2 ilaçe për këtë sëmundje.
OBSH publikoi para pak muajsh një listë me bakteret rezistente ndaj antibiotikëve, që janë ndër më të rrezikshmit për shëndetin e njeriut.
Në krye të kësaj liste ishin bakteret më të rrezikshme, si E. coli, që mund të shkaktojnë infeksione tek qarkullimi i gjakut dhe pneumoni tek pacientët.
Edhe infeksionet spitalore si C. difficile dhe MRSA (bakteri Staphylococcus aureus rezistent ndaj meticilinës) janë gjithashtu shqetësuese dhe mjaft të rrezikshëm sidomos për pacientët e sëmurë që kanë sistem të dobët imunitar.
“Rezistenca kundër baktereve është një emergjencë shëndetësore globale që rrezikon seriozisht progresin në mjekësinë moderne. Duhet që të bëhen urgjent më shumë investime në hulumtimin dhe zhvillimin për infeksionet rezistente ndaj antibiotikëve, përfshirë edhe turbekulozin, përndryshe rrezikojmë të rikthehemi në kohërat kur njerëzit i frikësoheshin edhe infeksioneve më të zakonshme dhe rrezikonin jetën edhe nga operacione shumë të lehta”, thotë dr. Tedros Adhanom Ghebreyesus, drejtor i përgjithshëm i OBSH-së.
