Shtatë milionë persona në vit vdesin nga konsumimi i duhanit në shkallë botërore. Shifra e frikshme u publikua sot nga OBSH-ja, gjatë prezantimit të një raporti, në prag të ditës ndërkombëtare pa duhan.
Më anë të këtij raporti Organizata Botërore e Shëndetësisë përllogarit, për herë të parë, kostot shëndetësore dhe ekonomike të duhanit dhe impaktin në mjedis.
“Çdo vit, më shumë se 7 milionë persona vdesin nga duhanpirja, kundrejt rreth 4 milionë që ishin në fillim të shekullit XXI”, sipas këtij raporti të OBSH-së.
Sipas raportit, në aspektin e shpenzimeve shëndetësore dhe të humbjes së produktivitetit, kostoja e duhanpirjes vlerësohet në më shumë se 1 400 miliardë dollarë, ose 1,8 për qind e prodhimit të Produktit të Brendshëm Bruto (PBB) të botës.
Dita Botërore pa Duhan, është një ditë që i kushtohet luftës kundër duhanit dhe mbahet që nga 1987 çdo 31 maj.
Në Shqipëri 4000 njerëz vdesin çdo vit nga pasojat që shkakton duhanpirja dhe sipas studimeve në vitin 2030, ky numër do të rritet në rreth 7,500 njerëz. /Tirana Today/
