Ish-presidenti amerikan, Barack Obama ka paralajmëruar se rrjetet sociale po përdoren në mënyrë të papërgjegjshme. Këtë deklaratë, Obama e bëri në një intervistë të rrallë që kur u largua në janar.
Ai paralajmëroi se veprime të tilla po shtrembërojnë kuptimin e njerëzve për çështje komplekse dhe përhapjen e keqinformimit.
Pasardhësi i tij Donald Trump është një përdorues besnik i Twitter, por Obama nuk e përmendi atë me emër. Obama u pyet nga Princi Harry në programin e BBC Radio 4 Sot.
Princi Harry është një nga disa figura të shquara, të cilët do të mirëpresin të ftuarit në këtë emision gjatë periudhës së Krishtlindjes.
Ish-presidenti tha se personalitetet me pushtet duhet të jenë të kujdesshëm kur publikojnë mesazhe, duke paralajmëruar se mediet sociale po shtrembërojnë diskursin civil.
Ai u shpreh i shqetësuar teksa foli për një të ardhme, ku faktet zhduken dhe njerëzit lexojnë dhe dëgjojnë vetëm gjëra që përforcojnë pikëpamjet e tyre.
“Një nga rreziqet e internetit është se njerëzit mund të kenë realitete krejtësisht të ndryshme. Ata mund të fshihen në informata që përforcojnë paragjykimet e tyre aktuale. Pyetja ka të bëjë me mënyrën se si e shfrytëzojmë këtë teknologji në një mënyrë që lejon një shumëllojshmëri të zërave, lejon shumëllojshmërinë e pikëpamjeve, por nuk çon në një ballkanizëm të shoqërisë dhe nuk lejon mënyra për të gjetur një bazë të përbashkët”, tha ai.
Trump është akuzuar për keqpërdorim të Twitter, edhe pse kjo llogari e lejon atë të lidhet drejtpërdrejt me popullin amerikan.
Teksa foli për momentin kur i dorëzoi pushtetin Trump, Obama përshkroi ndjenja të përziera, duke pasur parasysh “të gjithë punën që kishte mbetur pa u bërë gjatë mandateve të tij”. TIRANA TODAY
