Kandidatja e Partisë Socialiste për Qarkun e Fierit, Tatjana Piro (Nurçe), në takimin e saj përmbyllës me votuesit e qytetit të Lushnjës ka theksuar se 25 qershori do të sjellë ndryshimin për ta rikthyer këtë zonë në vendin që meriton.
“Jam këtu për t’ju thënë të gjithëve se, nuk kemi më kohë për të humbur, për ta rikthyer Lushnjën tonë në vendin që i takon: Zonjë e bukur mes Myzeqesë. Ndaj nuk më hyjnë sot në sy dekoratat, medaljet, urdhrat, apo vlerësimet e shumta që kam marrë në këto 59 vite të jetës sime. Sepse dua që të gjithë së bashku, t’i japim Lushnjës tonë, dekoratën që e meriton. Dhe premtoj, se bashkë me ju dhe për ju, do të jem fjala juaj e fuqishme në Kuvendin e Shqipërisë; do të ngre zërin për investime, për të mbledhur fonde, për më shumë rrugë e shkolla; për më shumë punësim e mirëqenie”, u shpreh ajo.
Për këtë arsye, ajo iu kërkoi qytetarëve që të marrin pjesë masivisht në zgjedhjet e së dielës. “Edhe pak orë na ndajnë nga mbyllja e fushatës dhe “heshtja zgjedhore”, ndaj po përfitoj nga rasti nëpërmjet rrjeteve sociale, që të mos harrojmë: Në datën 25 Qershor, të shkojmë të gjithë bashkë në kutitë e votimit. Të votojmë për Numrin 2, të votojmë për Partinë Socialiste, të votojmë për Edi Ramën kryeministër. Sepse të gjithë së bashku. Duhet të votojmë për Lushnjën që duam, për Shqipërinë që duam”, përfundoi Piro-Nurçe.
