Qeveria e Malit të Zi ka aprovuar Raportin për Zhvillimin dhe Mbrojtjen e të Drejtave të Popujve Pakicë dhe Bashkësive apo Pakicave të tjera Nacionale për Vitin 2016.
Në këtë raport, bëhet fjalë edhe për përfaqësimin (punësimin) e popujve pakicë në organet e administratës shtetërore të Malit të Zi.
Si model i përfaqësimit konkret merret organi i Drejtorisë së Policisë së Malit të Zi, ku janë pyetur 3.858 të punësuar lidhur me përkatësinë e tyre kombëtare, nga të cilët janë përgjigjur 3.377, ose 87.53% e tyre.
Në përfundim thuhet se janë: malazez 2.803 (83.00%), serb 223 (6.60%), boshnjakë 172 (5.09%), shqiptarë 45 ( 1.33%), kroat 3 (0.09%), romë 3 (0.09%) dhe të tjerë 5 (0.15%), kurse 39 prej tyre ( 1.15% ) pjesa tjetër nuk janë përgjigjur.
Pra, shqiptarët janë të përfaqësuar në këtë organ shtetëror vetëm me 45 të punësuar apo 1.33%, çka do të thotë një punësim shumë i ultë në krahasim me përqindjen e shqiptarëve në numrin e përgjithshëm të popullsisë në Mal të Zi.
Në të vërtetë, të dhënat e fundit lidhur me përfaqësimin e shqiptarëve janë të njëjta me atë të dy dekadave të kaluara.
