Pak çaste më parë, sikundër ishte njoftuar edhe më herët, ka nisur Asambleja Kombëtare e PS-së. Fjalën hapëse në këtë takim e ka marrë kryeministri Edi Rama, i cili ka preferuar që të ketë temë primare protestën e studentëve.
Ai ka nënvizuar se protesta e studentëve, ka bërë që qeveria të reflektojë për të gjitha mungesat që kanë sot të rinjtë në vendin tonë. Për të, kjo ishte një ngjarje tronditëse dhe prekëse. E të gjithë këtë shpërthim të studentëve, ai e justifikon me pasojat e politikës.
“Studentët kanë të gjithë të drejtën që të jenë të acaruar me ne, pasi nga ne presin më shumë. Të tjerët jo vetëm që si vlerësojnë, por i kanë përçmuar publikisht. Kjo ngjarje ishte tronditëse dhe prekëse, një nga momentet më të rëndësishme të karrierës sime politike.
Ky brez paguan sot për reformat që nuk u bënë këtu e 20 vite më parë. Janë pasojat e politikës që mendon për vezën sot, dhe jo për pulën mot”, u shpreh Rama.
‘’Sot unë akuzohem se pse nuk është askush në burg. Pse është drejtësia e padrejtë, akuzohem se pse prokurorët dhe gjykatësit vijojnë që të godasin të drejtat, mirëpo nga ana tjetër jemi në një kohë të ndërmjetme, dhe nuk na mbetet më gjë tjetër që ulim kokën dhe të punojnë. Për të treguar se e nesërmja do të na japë të drejtë”, tha më tej kryeministri.
