Në “Loro Boriçi” u zhvillua ndeshja e fundit e kualifikueseve për Botërorin e Femrave mes Shqipërisë dhe Skocisë. Kombëtarja kuqezi i femrave u mposht me rezultatin 2-1 dhe skocezet arritën të merrnin kokën e grupit me 21 pikë, duke u kualifikuar direkt për në grupe. Ndërsa Shqipëria e drejtuar nga Grima grumbulloi vetëm 4 pikë.
Shqipëria e pa veten në disavantazh që në minutën e 9’, kur Little kaloi Skocinë në epërsi. Ekipi kuqezi nuk u dorëzua dhe falë insistimit ka gjetur barazimin provizor para përfundimit të pjesës së parë, teksa në të 45’ ishte Doci që riktheu ekuilibrat. Gjithsesi, në pjesën e dytë, Skocia kaloi sërish në avantazh, kësaj here me Ross në të 68’, për të regjistruar fitoren e radhës.
Edhe pse pa shumë eksperiencë, Shqipëria e mbylli e parafundit renditjen duke lënë pas Bjellorusinë me 1 pikë më pak. Zvicra dhe Polonia mbajnë respektivisht vendin e dytë dhe të tretë të grupit, me nga 19 dhe 11 pikë.
