“Nuk kanë burrni”, Tare shpërthen ndaj menaxherëve

Në prag të ndeshjes që Lazio zhvilloi në Europa League, përballë Steaua Bucarest, drejtori sportiv i të kaltërve ka dhënë një intervistë për “Sky Sport”. Fjala kryesore e Igli Tares ka qenë dështimi i rinovimit të kontratës me qendërmbrojtësin holandez De Vrij vlerat e tij morale, të ardhmen e tij, duke shfryrë njëherësh të gjithë mllefin ndaj menaxherëve të lojtarit. Shqiptari i Lazios i ka akuzuar agjentët e lojtarit, si jokorrektë dhe ndjenë keqardhje që ai do të largohet me kosto zero, po ashtu shprehet se zëvendësues të tij ka pafund dhe do ta gjejnë shumë shpejt.

“De Vrij është një profesionist serioz, që do të japë 100% e tij deri në fund të sezonit. Ka marrë këtë vendim sepse të dy palët nuk gjetën marrëveshjen, me menaxherët e tij që nuk u treguan korrekt. Tani shohim përpara, bashkë me atë kemi fituar shumë dhe kemi bërë rezultate pozitive. Shpresojmë ta mbyllim suksesshëm këtë sezon, më pas mund të shkojë ku të dojë. Zëvendësuesi i De Vrij? Do të bëjmë përpara edhe pa atë, pasi në qarkullim ka sa të duash futbollistë të fortë. Lazio po bën gjëra të mëdha, kemi rifituar edhe tifozët tanë. Nuk jemi një klub kalimtar”, deklaroi Tare.