Kryeministri Edi Rama ka vizituar sot një familje, për t’i ofruar ndihmë ekonomike, ndërsa është treguar mjaft i prerë lidhur me këtë çështje, ku tha se nuk do të përfitojnë më familjet që kanë mundësi të punojnë, por zgjedhin të mos punojnë.
“Thirrja që unë përsëris është nuk ka shans të marrin ndihmë ekonomike, nëse janë të aftë për punë dhe nëse u ofrohet punë, pastaj është punë e tyre,” u shpreh Rama prerazi, ndërsa solli në vëmendje një rast me një të ri, të cilit i kishte ofruar punë.
“Në Bashki do punoj? Jo në privat, i thashë unë. Ahh, jo në privat nuk punoj unë. Këta janë të çuditshëm”, u shpreh Rama, duke treguar rastin në fjalë.
E pranishme në këtë takim ishte edhe ministrja e Shëndetësisë, Ogerta Manastirliu, e cila tha se janë përjashtuar 700 familje ku pjesa më e madhe janë abuzivë.
“Janë përjashtuar 700 familje ku pjesa më e madhe janë abuzivë, ndërkohë që ka një pjesë minimale që është pjesë e marzhit të gabimit që ne po e verifikojmë. Me skemën e re ne nuk vazhdojmë më me ndihmën e pjesshme. Tani ndihma është e plotë, se ka pasur nga ata që kanë marrë edhe 6 mijë lekë. Kjo ndihmë jep pak mundësi për frymëmarrje, nuk po themi që është më e mira e mundshme. Ka shumë njerëz që kanë dalë nga skema, sepse nuk e meritojnë, dhe nuk duan të punojnë,” u shpreh Rama.
