Milani nuk do të luaj në Europa League, këtë lajm të bujshëm e ka zbuluar ditën e sotme “New York Times”. Prestigjiozja amerikane ka shkruar se UEFA do ta ndëshkojë Milanin duke e përjashtuar nga edicioni i ardhshëm e Europa League për çështjen e fair-play-it financiar. Një goditje e rëndë kjo për kuqezinjtë që do të dëmtojë akoma edhe më shumë imazhin e tyre.
Vendimi i UEFA-s për Milanin do të jepet më 15 qershor por edhe në rast se i shpëtojnë përjashtimit nga kompeticionet europiane, kuqezinjtë rrezikojnë shumë pasi mund të marrin një gjobë shumë të majme ose mund t’u bllokohet merkato për verën e ardhshme.
Nëse alarmi që lëshon New York Times rezulton të bëhet realitet, atëherë Milani do të bëhej klubi i parë i madh që do të përjashtohet nga kompeticionet europiane. 7-herë kampionët e Europës pak ditën më parë dështuan për të disatën herë për të arritur një marrëveshje me UEFA-n për çështjen e fair play-it financiar.
