Nuk ka fitues në “Velodrome”, pasi ka përfunduar në 2-2 supersfida mes Marseille dhe PSG. Një stadium i tejmbushur dhe një atmosferë elektrizuese shoqëroi sfidën për 90’ minuta. Një ndeshje me një ritëm mjaft të lartë kanë zhvilluar yjet e të dy ekipeve. Është Marseille që e nis mirë dhe dominon në fillimin e pjesës së parë duke gjetur rrugën e rrjetës në minutën e 16’ me Luiz Gustavon. Por është ylli brazilian Neymar, që vendos barzpeshën pa u mbyllur pjesa e parë. Të dyja skuadrat dalin rrjedhshëm në sulm, por në çdo moment kthehen në mbrojtje duke ia ditur rëndësinë sfidës, Pjesa e dytë fillon me një ritëm të jashtëzakonshëm për të dy ekipet, luftohet shumë fort në mesfushë dhe asnjëra nuk duket se do të kënaqet me barazimin.
U desh të arrinte minuta e 78’ që Marseille të gjente rrugën e rrjetës me anë të Thuavin. PSG fillon të vuajë në minutat e fundit, pasi ndëshkohet edhe Neymar me karton të kuq. Një zhgënjim i madh për parisienët që do provonin gjithçka për të mos u mundur. Në limitet e kohës është Edison Cavani që arrin të gjejë rrugën e rrjetës dhe të vendos heshtje në stadium.
Në këtë sfidë u nderua edhe Lorik Cana për lamtumirën nga futbolli, bashkë me Djibril Cise.
