Menjëherë pas deklaratave te djeshme të Kryeministrit Edi Rama lidhur me Teatrin kombëtar, kanë reaguar aktorët e këtij institucioni dhe janë shprehur se ditën e sotme do të dalin në një deklaratë për shtyp. Kreu i Sindikatës së Aktorëve të Teatrit Kombëtar, Arben Derhemi tha se nuk ka më kuptim pritja për një takim të ministres Kumbaro, dhe nëpërmjet një dëklarate për shtyp ne do t’i japim një përgjigje Kryeministrit karshi gjuhës dhe fjalorit që ai përdori ditën e djeshme në parlament.
Derhemi i revoltuar ka thënë se vetë ministrja e Kulturës i ka premtuar atyre se Teartri nuk do të prishet dhe nëse do të arrinin të kishin një kompromis mes palësh, në vend të Teatrit nuk do të ndërtohej asgjë tjetër veçse një Teater me kushte Europiane.
“Tashmë, pritja për takim në ambientet e Teatrit nuk ka më kuptim, ministrja e Kulturës Mirela Kumbaro premtoi publikisht se në këtë territor nuk do të ndërtohet veçse teatër dhe ramë dakord që nuk do të lëvizim prej këtej. Ndërkohë, përfaqësuesit tanë do të ulen në tryezë me të, për të diskutuar projektligjin. Por përmes një deklarate ne do t’i përgjigjemi qëndrimit të Kryeministrit karshi artistëve, për gjuhën e përdorur prej tij në komentet e fundit për shqetësimet e artistëve”, tha Derhemi, duke shtuar se do t’i qëndrojnë deri në fund vendimit të tyre për të mos u larguar nga ai teatër, pa parë projektin e ri, që në mendimin e tij personal, do të ishte më e arsyeshme ruajtja e fizionomisë së teatrit ekzistues, duke respektuar kështu historinë gati 70-vjeçare të këtij institucioni.
Komenti i Kryeministrit në rrjetet sociale artistët i ka zhgënjyer dhe duken mjaft të prekur prej tij.
“Nuk e di çfarë plasje kanë, po di që debati për të mbrojtur godinën e rrënuar të teatrit, është një debat i stërvjetër, i stërlodhur dhe pa asnjë vlerë e asnjë kuptim sot! Sa ka bërë qeveria ime për teatrot, muzetë, stadiumet në vetëm 4 vjet, nuk i kanë bërë të gjitha qeveritë bashkë në 25 vjet! Nuk mjaftojnë? Aspak. Por ama leksione të asnjë lloji s’na jep dot askush dhe në këto katër vjet do bëjmë ende më shumë, përfshirë edhe Teatrin e ri Kombëtar, duan s’duan ata që s’dinë çfarë duan!”, është shprehur Rama. Të tjera batuta ai ka hedhur dje nga foltorja e Parlamentit.
