Shqiptaro-amerikani Xhon Alite, ish-pjesëtar i familjes mafioze Gambino, është më i njohuri ndër shqiptarët kohët e fundit, për shkak dhe të librit që ka botuar, apo intervistave televizive.
Por gangsteri më i frikshëm shqiptar në SHBA ka qenë padyshim Xhevdet (Xhoi) Lika. I njohur ndryshe edhe si Ismail Lika, Xhoi ishte nga figurat kryesore të botës së krimit në Nju Jorkun e viteve 1970-1980.
Në librin “Vrasësi me pagesë” nga Hoffman & Headley, shkruhej se “ndonëse nuk ishte në lartësinë e Al Kapones apo Xhon Gotit, Xhevdet Lika ishte i njohur në botën e krimit ndërkombëtar”.
Ai i urrente mafiozët italianë, por edhe ata e kishin frikë për shkak se ishte tepër i dhunshëm. Njerëzit nën urdhrat e tij ishin të gatshëm të kryenin atentate ndaj Xhon Gotit, Pol Kastelanos, apo edhe vetë presidentit Ronald Regan, nëse ua kërkonte Lika.
Organizata e tij shpërndante heroinë në lagjet elitare të Manhatanit. Droga merrej nga ish-Jugosllavia dhe Turqia, ku Lika kishte bashkëpunëtorë. Më 1981 bëri një gabim fatal. Së bashku me dy anëtarë të bandës, vrasin një tjetër shqiptar M.Saljani.
Një kushëri i këtij të fundit i mbijetoi përleshjes së armatosur, dhe u bë dëshmitar i mbrojtur i drejtësisë amerikane. Këtu merr fund edhe aktiviteti kriminal i Xhevdet Likës.
Sipas policisë amerikane ai transportonte drogë me vlerë 125 milionë dollarë nga Ballkani dhe e trafikonte në Nju Jork, Kaliforni, Teksas dhe Ilinois. Gjyqi ndaj tij u drejtua nga prokurori Rudi Xhuliani, që u kërcënua me vdekje nga babai i Likës.
Gjyqi ndaj Xhevdet Likës u mbush plot me familjarë shqiptarë. Ai u dënua me dënim të përjetshëm, vendim që nuk e apeloi. Duke vrarë një shqiptar, ai ishte tashmë në gjak me familjen e viktimës, ndaj burgu mbetej vendi më i sigurt për të.
PËRGATITI TIRANA TODAY
