Rubrika “Njerëz” sjell kësaj here rrëfimin e Gersi Troka, një 17 vjeçari, i cili është një prej notarëve më të mirë në vendin tonë. Të qenit me sindromën Down nuk e ka penguar aspak Gersin të ndjekë pasionin dhe ëndrrat e tij e të luftojë çdo ditë për të qenë i pari.
9 vjet më parë Gersi nisi notin si një mënyrë që do ta ndihmonte në zhvillimin e tij. Por, sot ai numëron dhjetëra çmime brenda e jashtë vendit dhe ai kërkon të jetë kampion noti në nivel kombëtar dhe ndërkombëtar.
Në këtë reportazh të “Njerëz”, Gersi rrëfen ndjesitë e tij sa herë që zhytet në pishinë dhe noton, marrëdhënien e veçantë me profesorin e tij të notit Sajmir Neziri dhe dëshirat për të ardhmen. Gjithçka që Gersi kërkon është mundësia për të garuar në një skuadër për të rinjtë si ai. Është pikërisht dëshira e tij e madhe dhe vullneti për të “qenë i pari” siç tregon vetë ai, që e ka bërë Gersin të fitojë disa çmime në gara të ndryshme me ndihmën dhe mbështetjen e nënës së tij, e cila kujdeset që ai të mos mungojë në asnjë seancë stërvitore por edhe të profesor Nezirit.
Gersi Troka përfaqësoi për herë të parë Shqipërinë në Garat Ndërkombëtare të Individëve me Sindromën Down, “Trisome Games 2016” që u mbajt në Firence të Italisë ku dhe doli i gjashti. TIRANA TODAY
