Kampionia e atletikës Luiza Gega dominoi rivalet e saj në garën e 3000 metrave me pengesa në Kampionatin Europian, duke marrë medaljen e artë. Gëzimi mund të kishte qenë i dyfishtë nëse Elina Tzengko do të kishte zgjedhur të përfaqësonte Shqipërinë dhe jo Greqinë.
19-vjeçarja shqiptare e rritur në Greqi nga prindër emigrantë atje, ka arritur të triumfojë në garën e hedhjes së shtizës, duke marrë medaljen e artë me distancën 65 metra e 81 centimetra.
Një arritje e shkëlqyer për Xhengon e cila prej vitesh ka tentuar të garojë me Greqinë, por nuk lejohej pasi nuk kishte ende dokumentet e nënshtetësisë greke. Sportistja ia doli dy vite më parë dhe që atëherë nuk ndalet më, duke siguruar sukses pas suksesi, pavarësisht moshës së re, siç ishte medalja e artë në Europianin e Atletikës.
Në vitin 2018, Elina mori nënshtetësinë greke, vendi ku është lindur, rritur dhe stërvitur në këtë sport. Pas triumfit në hedhjen e shtizës, Elina Tzengko, është ndalur të flasë edhe për rrënjët e saj.
“Përpara pak vitesh, as që mund të konkurroja jashtë Greqisë sepse nuk kisha shtetësi. Nuk kishte ndjesi më të keqe. Kisha lindur në Greqi por ndihesha e huaj. Prindërit e mi janë shqiptarë, nuk e mohoj dhe nuk e kam as turp ta them një gjë të tillë, megjithatë unë kam lindur në Greqi dhe e dua edhe këtë vend.
Së pari babai im u largua kur nëna ime ishte shtatzënë me motrën time më të madhe. Ai mbërriti në këmbë nga Shqipëria në Halkidiki, dhe kur gjeti punë si ndërtues, nëna ime e ndoqi.
Përshtatja e tyre me Greqinë nuk ishte e lehtë. Ata kishin lënë punën e tyre (babai im ishte polic dhe nëna ime ishte mësuese), ata nuk njihnin askënd, nuk flisnin gjuhën dhe kur lindi motra ime, ata jetonin në një dhomë pothuajse bosh. Një dyshek, një tavolinë, një enë… Nuk u ankuan kurrë…”, ka thënë ajo në një intervistë për mediat greke.
