Një kroçerë e cila po lundronte mbrëmjen e djeshme në Karaburun ka kërkuar asistencë mjekësore për një të sëmurë.
Kapiteneria Vlorë mori një thirrje në radio nga një kroçere me emrin “Costa Victoria” e cila ishte duke lundruar në afërsi të gadishullit të Karaburunit, nga ku kërkonte një asistencë mjekësore pasi kishte një person të sëmurë ne bord. Menjëherë u njoftua ambulanca e qytetit dhe policia kufitare për këtë situatë.
Kroçera mori udhëzim të afrohej në radhën e portit të Vlorës dhe të merrte asistencën e kërkuar, pasi personi duhej të zbarkohej në tokë dhe të shkonte drejt Spitalit Rajonal Vlorë.
Më pas kapiteni i portit bashkë me personelin e ndihmës së shpejtë kanë shkuar në bordin e kroçerës për të marrë të sëmurën në barelë, duke bërë të mundur transportimin e saj drejt spitalit.
Rreth orës 23:00 personi i sëmurë u vendos me kujdes tek ambulanca e urgjencës për në drejtim të spitalit rajonal Vlorë për procedurat e mëtejshme mjekësore.
