Ka përfunduar 1-1 në “Selman Stermasi”, përballja mes 21-vjecarëve të Shqipërisë dhe Irlandës së Veriut. Ka qenë një ndeshje e luajtur mjaft mirë nga djemtë e Bushit, të cilët e kontrolluan pothuajse të gjithë ndeshjen por në fund ishin të pafat dhe u barazuan. Kjo ishte një ndeshje mjaft e mirë dhe që premton se ekipi Shpresat ka një kontingjent mjaft të mirë lojtarësh që mund të zenë vend shumë shpejt në Kombëtaren A. Është Ylber Ramadani që ka gjetur golin për shqiptarët, ndërsa për miqtë shënoi vetëm 6 minuta më vonë Lavery.
Pjesa e parë ishte mjaft e qetë, pasi të dy ekipet luajtën të tërhequr dhe nuk rrezikuan shumë, por që u dominua nga kuqezinjtë e Bushit edhe pse nuk arritën që të gjenin rrugën e rrjetës. Bare dhe Çekiçi provuan me ndonjë shpërthim apo ndonjë goditje nga distanca por nuk arritën të vinin në rrezik portën e kundërshtarit.
Ndërsa pjesa e dytë u zhvillua në ritme të tjera, shqiptarët dominonin në çdo pjesë të fushës dhe kombinonin mjaft mirë, por sëmundja për të shënuar vazhdonte sërish. Pas shumë tentativash në minutën e 83, pas disa goditjesh të njëpasnjëshme është Ylber Ramadani që godet nga jashtë zone dhe e dërgon topin atje ku portieri nuk mund të bënte asgjë.
Pas ati goli ekipi u duk se u tërhoq mbrapa dhe po vuante presionin e irlandezëve, të cilët duke rritur presionin në sulm vetëm pas 6 minutash arritën ta barazonin ndeshjen me anë të Lavery. Momenti kur u ndëshkuan kuqezinjtë ishte një vendosje e keqe e mbrojtësve, të cilët nuk ishin aspak të qetë pasi shënuan dhe kjo bëri që të hutoheshin në atë moment.
Për të ardhur keq që ekipi i Shpresave mori një pikë në këtë ndeshje pasi kishte të gjitha mundësitë ta fitonin ndeshjen, për tu vlerësuar është edhe mentaliteti që ka ekipi në fushën e lojës. Një qarkullim topi mjaft i mirë dhe ku binin në sy disa lojtarë me shumë kualitete si Ramadani që tashmë do të jetë edhe me kombëtaren A, Çekiçi dhe Ndoi. Me këtë barazim Shqipëria qëndron në vendin e tretë me 6 pikë dhe vazhdon të shpresojë për të arritur vendin e dytë.
