Nga: Marsela Sinani/ Një letër e gdhendur me aq mjeshtëri nga një ndër emrat më të përfolur, Izet Haxhia, drejtuar të dashurës së tij, ka krijuar shumë zhurmë, kjo për faktin e thjeshtë, pasi është postuar në rrjetet sociale.
Dëshmitë ndër vite flasin edhe për shkelje nga vetë të burgosurit, pavarësisht kontrolleve të rrepta në burgje. Pavarësisht kësaj, të dënuarit shqiptarë rezultojnë me adresa e postime në “Facebook” dhe me celularë. Rrjetet sociale në burg duhet të jenë një “mollë e ndaluar”, por në fakt historia ka treguar se shumë gjera ndryshohen rrugës. Mjafton të klikosh në “Facebook” për emra të njohur të botës së krimit, e për të dënuar të përjetshëm dhe disa i gjen fare lehtë.
Një lajm që po bën xhiron në rrjetet sociale, tregon një letër që ai e ka “qëndisur” për të dashurën e tij, me rastin e ditëlindjes. Është po kjo e fundit e cila e ka ndarë këtë letër me të gjithë ndjekësit.
Ajo ka publikuar letrën që i ka derguar nga burgu, ku ndodhet pas ekstradimit nga Turqia për vrasjen e Azem Hajdarit.
Duke iu referuar ligjit, personat që kapen me sende të ndaluara në burgje do të ridënohen. “Futja ose mbajtja e sendeve të ndaluara në institucionet e ekzekutimit të vendimeve me burgim, të cilat sipas legjislacionit në fuqi janë të ndaluara, dënohet me burgim nga një deri në tre vjet.
Po kjo vepër kur kryhet në bashkëpunim, më shumë se një herë, ose nga personi që ka për detyrë ruajtjen dhe sigurinë fizike, ose që për shkak të detyrës ose profesionit ka të drejtë të hyjë në institucione burgimi, dënohet me burgim nga pesë vjet deri në dhjetë vjet”.
Pavarësisht këtij ligji, shkeljet janë evidente, por letra e tij nuk përbën asnjë shkelje, pasi profili i tij menaxhohet nga dikush tjetër. Pavarësisht hamendësimeve, qytetarët janë në dijeni!
Prej kohësh Izet Haxhia është aktiv në media dhe rrjetet sociale, ku nuk ka reshtur së akuzuari ish-shefin e tij Sali Berisha si të përfshirë në vrasjen e Azem Hajdarit. Ai ka qenë truproja i parë i Sali Berishës, njeriut që ka drejtuar më shumë Shqipërinë që nga viti 1992.
