Një sulmues meksikan për Kamzën. Klubi nga periferia e kryeqytetit ka përforcuar repartin e avancuar me një bomber që vjen nga Meksika. David Izazola, 27-vjeçari i lindur në Ciudad de Mexico është sulmuesi më i ri i Kamzës, lajmin e ka konfirmuar vetë klubi i Superiores në faqen zyrtare.
Së fundmi Izazola është aktivizuar në kategorinë e dytë meksikane me skuadrën e Atlantes me të cilën në 9 takime nuk ka realizuar asnjë gol. Në të kaluarën sulmuesi është aktivizuar edhe në ligën e parë meksikane me skuadrën e Pumas UNAM. Izazola është meksikani i parë i cili do të luajë në Kategorinë Superiore.
Sulmuesi është afruar nga Fabio Kordela, i cili e njeh mjaft mirë lojtarin, pasi më parë ne ka pasur edhe tek skuadra e Honved. Shumë shpejt lojtari do ti bashkohet Kamzës në stërvitje, teksa do të rivalizojë për një fanellë titullari me Martinenan, Rezin por edhe Sebino Plakun.
Lojtari është 27 vjeç dhe ka një karrierë të pasur, pasi ka luajtur me shumë ekipe. Ai ka provuar dhe Europën me skuadrën hungareze të Honved, por ka koleksionuar vetëm 82 minuta. Në të gjithë karrierën e tij si sulmues, Izazola ka shënuar 13 gola, referuar statistikave të “Socerway“. Megjithatë, vlera e kartonit të tij është goxha e lartë, pasi vlerësohet me 400 mijë euro. Aventura e tij fundit është në Indi me skuadrën e Churchil Broth. Një bast i guximshëm nga drejtuesit e Kamzës.
