Në ditën Ndërkombëtare të Librit, Ministria e Kulturës dhe Bashkia e Tiranës kanë ndërmarrë një nismë, ku të gjithë ata që do të mbajnë një libër me vete ditën e nesërme, do të mund të udhëtojnë falas me transportin publik.
“Para pak kohësh, shihja punonjësit e Ministrisë sonë, të cilët afroheshin në Kinostudio me një libër në dorë për të kaluar momentet e tyre në autobus dhe menduam se do të ishte shumë mirë sikur kjo të merrte edhe një vlerë tjetër. Kjo nismë, i drejtohet edhe studentëve, që udhëtojnë çdo ditë drejt universiteteve, edhe si një ndihmë për ta, por edhe për ne për t’i bashkuar të gjithë drejt librit”, thotë Elva Margariti, Ministre e Kulturës.
Mësohet se ditën e nesërme do të ketë aktivitete të ndryshme që i kushtohen librit në institucionet kulturore, jo vetëm në Tiranë por edhe në rrethe.
