Dita e parë e tetorit ka nisur me realizimin e fushatës më të fundit të fondacionit “Fundjavë Ndryshe”, me konkretizimin e nismës humane “Dhuro Gjak”.
Në ambientet e këtij fondacioni në Tiranë dhe Durrës, duke nisur që nga ora 09:00 janë shfaqur qindra persona, shumica e të cilëve të rinj, me dëshirën e mirë për të ndihmuar çdo person që ka nevojë për gjak.
Kështu, një numër i madh njerëzish kanë dhuruar gjak, duke dhënë një mesazh të madh për të gjithë ata që munden të shpëtojnë një jetë.
“Është një emocion i madh që s’mund ta kuptosh pa e provuar. Më vjen mirë që njerëzit kanë filluar të ndërgjegjësohen për rëndësinë që ka kjo fushatë”, thotë Refxhei, një nga dhurueset.
Fushata e “Fundjavë Ndryshe” për dhurimin e gjakut do të vijojë edhe në Vlorë dhe Elbasan, të shtunën më 07 tetor, si dhe në Pogradec dhe Dibër, të dielën më 15 tetor.
