Ish presidenti Bujar Nishani, ka paditur për shpifje kryeministrin Edi Rama, lidhur me akuzën publike të tij se “vëllai i Presidentit e ktheu në loto mensën në Qyteti Studenti”.
Nishani siguron se i vëllai as nuk ka tentuar, as nuk ka privatizuar kurrë ndonjë objekt në Qytetin Studenti.
Por ditën e sotme kryeministri Rama i është përgjigjur reagimit të Bujar Nishanit. Në një takim me studentët e konviktit të Mjekësisë, Rama u shpreh: Pak kohë më parë thash se vëllai i një ish-presidenti ktheu në loto mensën në Qyteti Studenti, por nuk përmenda asnjë emër. Nuk e kuptoj pse reagoi menjëherë Nishani duke më akuzuar për shpifje.
Ka edhe ish-presidentë të tjerë, pse duhet të reagonte pikërisht ai? Nuk është e vështirë për ta kuptuar, por unë jam i gatshëm që të përballem me paditë e tij”.
Më poshtë reagimi i PD-së, ku lajmëron se Nishani ka vendosur të padisë për shpifje Edi Ramën:
“Ish presidenti Bujar Nishani vendosi të padisë për shpifje kryeministrin Edi Rama, për akuzën publike të tij se “vëllai i Presidentit e ktheu në lloto mencën në Qyteti Studenti”.
Ish presidenti siguron se i vëllai as nuk ka tentuar, as nuk ka nuk ka privatizuar kurrë ndonjë objekt në Qytetin Studenti. Zoti Nishani e sfidon Edi Ramën, si njeriu që ka në dorë çdo pushtet dhe çdo zyrë publike, nga tatimet tek hipoteka, të bëjë publike dokumentat që provojnë se vëllai i ish presidentit është pronar i ish mencës në Qytetin Studenti apo ka kryer ndonjë aktivitet llotoje aty.
Pak kohë më parë, për të vërtetuar se e njëjta akuzë ishte shpifje, ish presidenti Nishani publikoi certifikatat e pronësisë së pronarëve të ligjshëm, që nuk kanë asnjë lidhje me familjen apo të afërm të tij”.
