Partia Socialiste nis nesër ‘shkollën verore’ për deputetët e rinj që fituan mandatet në zgjedhjet e 11 majit. Gjatë kësaj periudhe, deputetët do të ndjekin trajnime për të njohur procesin legjislativ, sjelljen në parlament, detyrat dhe të drejtat që u garanton Kushtetuta.
E ftuar në një emision televiziv, deputetja e zgjedhur në qarkun e Korçës, Romina Kuko, bëri të ditur se leksioni i parë do të mbahet nga kryeministri Edi Rama, ndërsa programi i plotë i trajnimeve do të vijojë deri në fund të korrikut.
“Të jesh deputet ka një pjesë shumë të rëndësishme institucionale. Kur hyn në parlament, të gjithë biem dakord që ka një shtyllë të fuqishme që duhet përvetësuar. Rama tha se kjo akademi duhet të niste me një edicion të posaçëm për deputetët e zgjedhur. Nesër është leksioni i parë nga Rama, më pas më 20 qershor hapen leksionet e tjera dhe do të zgjasin deri në fund të korrikut,” u shpreh Kuko.
Sa i përket rinumërimit të votave, ajo theksoi se është e rëndësishme të pritet certifikimi i rezultatit nga KQZ për të sqaruar çdo paqartësi.
“Të gjithë duhet të presim përfundimin e rinumërimit për të parë nëse pretendimet janë të bazuara. Më mirë që ndodhin këto procese për të qartësuar të gjitha palët. Pasi KQZ të certifikojë rezultatin, nuk besoj se do të ketë më hapësirë për komentime lidhur me zgjedhjet,” tha ajo.
Në lidhje me negociatat për anëtarësimin e Shqipërisë në Bashkimin Europian, Kuko u shpreh optimiste, duke deklaruar se vendi mund t’i mbyllë ato deri në vitin 2027.
“Sot Shqipëria është përpara edhe Malit të Zi dhe konsiderohet si pararojë në këtë proces në Ballkanin Perëndimor. BE nuk ka pasur zgjerim që nga viti 2007 dhe në këtë aspekt, Shqipëria dhe Mali i Zi kanë dritë jeshile. Shanset për t’i mbyllur negociatat në 2027 janë shumë reale,” përfundoi Kuko.
