Një person ka humbur jetën dhe dy të tjerë janë plagosur si pasojë e disa të shtënave me armë zjarri në Elbasan.
Viktima është E.K. me precedentë të mëparshëm penalë. Ai është transportuar në spitalin Rajonal për ndihmë mjekësore pas plagosjes, por nuk ka mundur të mbijetojë.
Ndërsa të plagosurit janë Indrit Alibej dhe Arben Dylgjeri. Ngjarja ka ndodhur në afërsi të Kombinatit Metalurgjik.
Tre personat kanë qenë në një makinë dhe janë qëlluar në prani të familjarëve të tyre. Gjendja e të plagosurve është e rëndë. Makina ndaj të cilës është bërë atentati ishte me targa italiane.
Dyshohet se përplasja me armë lidhet me përplasjen e bandave në qytetin e Elbasanit. Forca të shumta police në vendngjarje po punojnë për zbardhjen e plotë të shkaqeve dhe rrethanave të ngjarjes së rëndë.
