Kreu i Grupit Parlamentar të Partisë Socialiste, i njohur dhe si krahu i djathtë i kryeministrit Edi Rama, Taulant Balla, ka marrë një goditje të fortë, pasi iu zbulua skandali i plagjiaturës. Universiteti i Rumanisë “Alexnadru Ioan Cuza University” ka nisur zyrtarisht hetimet për plagjiaturën e numrit dy të PS.
Në një email dërguar Exit.al, Universiteti “Alexandru Ioan Cuza University”, në Iasi të Rumanisë, ka konfirmuar se po heton zyrtarisht plagjiaturën e deputetit të Partisë Socialiste, Taulant Balla.
Balla akuzohet se ka kopjuar pjesë të tëra të doktoraturës ‘Politikëbërja në BE: Arritjet, Sfidat dhe Propozimet për Reformë’, kryer nga Andrea Renda ,për Qendrën për Studime Politike Evropiane në Bruksel. Këtë studim, deputeti Balla e përdori për disertacionin e tij të vitit 2015 ‘Reforma e Sistemit të Vendimmarrjes në Bashkimin Evropian’, për të cilin mori vlerësimin më të lartë.
Balla është një nga disa zyrtarët e lartë të PS, i cili u zbulua se kishte kopjuar për të fituar titullin akademik. Në email-in e saj, Lidia Bourceanu e Departamentit të Marketingut në Universitetin Alexandru Ioan Cuza, deklaroi:
“Meqenëse institucioni ynë i arsimit të lartë mbështet fuqishëm të gjitha procedurat dhe politikat që synojnë shkurajimin e të gjitha formave të vjedhjes intelektuale, në çfarëdo rrethanë, e shohim si shumë shqetësuese çështjen e sjellë në vëmendjen tonë. Mesazhi juaj është regjistruar (me numër UAIC 1947/04.02.2019) dhe do t’i kalohet Komisionit të Etikës, me qëllim analizimin me rigorozitetin dhe profesionalizmin maksimal”.
