Bashkia e Tiranës po i kushton vëmendje të veçantë strukturimit të shërbimit të administratorëve të pallatave. Pas miratimit të ligjit për administrimin e pallatave, vihet re një këmbëngulje nga ana institucionit të bashkisë për zbatimin sa më parë të tij, me qëllim përmirësimin e cilësisë së shërbimeve që merr çdo banor kryeqytetas.
Sipas kryebashkiakut Erion Veliaj, faza e parë që i paraprinë këtij aksioni, është krijimi i një rrjeti punonjësish të përzgjedhur nga qytetarët dhe të certifikuar nga Bashkia e Tiranës, të cilët do të vihen në shërbim të komunitetit dhe zgjidhjeve të problematikave që lindin prej bashkëpronësisë.
Veliaj, me anë të një videomesazhi u bëri thirrje qytetarëve që të bashkëpunojnë dhe të bëhen pjesë e projektit për zgjedhjen e administratorëve të rinj të pallateve.
“Prej vitesh ne kemi trashëguar një sërë problematikash në pallatin tonë, në komunitetin tonë, në lagjen tonë. Bashkia e Tiranës ka një plan konkret se si këto mund të zgjidhen. Një punonjës i bashkisë do të vijë shumë shpejt në derën tënde për të ftuar që të jesh pjesë e vendimmarrjes për administratorin e ri të pallatit. Ky administrator i ri do të kujdeset për të gjithë hapësirën e përbashkët dhe do të zgjidhë shumë prej problemeve në komunitet. Ne provat e para i kemi dhënë, por ka ardhur koha që edhe ti të bëhesh pjesë e këtij ndryshimi të madh për ta sjellë Tiranën në një qytet me parametra europianë”, iu drejtohet Veliaj bashkëqytetarëve të tij.
Deri tani Bashkia e Tiranës ka liçensuar 50 administratorët e parë të pallatave.
