Ish-ministrja e Arsimit ka vijuar kundërpërgjigjen ndaj deputetes së LSI-së, Kejdi Mehmetaj.
Të dyja ato kanë pasur replika të vazhdueshme sot me njëra-tjetrën, ndërsa së fundmi është Nikolla, e cila ka refuzuar ftesën për debat televiziv.
Lindita Nikolla i shkruan drejtpërdrejt deputetes se ka hyrë shumë thellë në rrugën e gënjeshtrave, ndërsa shton se ka gabuar në vlerësimin e saj lidhur me të.
“Çdokush bën zgjedhjet e veta: ti me gënjeshtrat si shans për të gjithë, unë me të vërtetat si sjellje me të gjithë. Këtu mbaron edhe komunikimi ynë publik”, përfundon Nikolla duke i mbyllur çdo mundësi debati deputetes së LSI-së.
REAGIMI I PLOTË I NIKOLLËS:
Kejdi, mesa duket nuk e kisha kuptuar se ke hyrë shumë thellë në rrugën e gënjeshtrave. Ti je shumë larg të qenit e edukuar në raport me të vërtetën!
Më vjen sinqerisht keq që paskam gabuar në vlerësimin tim në lidhje me ty. Gabimet e tua i kam menduar si mungesë përvoje dhe formimi, kur në fakt janë mungesë respekti për të vërtetën.
Unë e dashur Kejdi, Fakultetin e Shkencave të Natyrës, të Universitetit të Tiranës, e kam përfunduar në vitin 1989. Që nga koha kur jam bërë pjesë e politikës, mund të kem bërë gabime sa të duash, por kurrë nuk kam gënjyer. Çdokush bën zgjedhjet e veta: ti me gënjeshtrat si shans për të gjithë, unë me të vërtetat si sjellje me të gjithë. Këtu mbaron edhe komunikimi ynë publik. Le të presim 25 qershorin për të tjerat.
