Rama ka prezantuar një vendim të ri, në lidhje me nxënësit dhe mësuesit, se duke nisur nga dita e hënë, ata në mënyrë kategorike nuk do të lejohen që të mbajnë celularë në orën e mësimit. Kjo kërkesë është parashtruar edhe më herët nga Ministrja e Arsimit, Lindita Nikolla.
Viti i ri shkollor vjen me një risi për nxënësit dhe mësuesit e arsimit parauniversitar, nga cikli fillor e deri tek ai i mesëm. Telefonat celular nuk do lejohen të përdoren gjatë procesit mësimor. Ky është urdhri i firmosur më herët nga Ministrja e Arsimit dhe Sporteve, Lindita Nikolla. Nisma në fjalë parashikon fokusimin e nxënësve, por edhe të mësuesve në funksion të procesit mësimor.
Kryeministri Rama, gjatë takimit me mësuesit që u emëruan në arsim përmes portalit ‘Mësues për Shqipërinë’, tha qartazi se nxënësit nuk do të lejohen që të mbajnë telefona në shkollë. Po kështu edhe për mësuesit. Një nismë e tillë shtoi kryeministri, do të shtrihet më pas edhe në institucionet shtetërore, pasi sipas tij, janë bërë si klube interneti.
“Libri është miku më i mirë, fëmijët e kuptojnë, por jo prindërit. Zhgarravitja e librit u duket liri, ruajtja diktaturë, nuk është çështje lekësh. Është lidhja me atë objekt që i flet mendjes, zemrës dhe të bën të dallosh nga të tjerët.
Penalitetet për atë që nuk kthejnë librat janë për prindërit, jo për fëmijët. Janë për këta që stresohen. Nuk do të lejojmë celular në shkollë. As për fëmijët dhe as për mësuesit, do të duhet ti dorëzojnë në fillim të mësimit dhe ti marrin në fund.
Muajin e parë ta bëjmë muaj edukimi dhe në muajin e dytë, merren hidhen në plehra, sepse janë ndotës të rrezikshëm të mjedisit arsimor. Dhe çfarë bëjmë me ndotësit me rrezikshmëri? I varrosim dhe i riciklojmë. Ky do të jetë një ndryshim i madh. Po përgatitemi të heqim celularët edhe nga institucionet e shtetit, që janë bërë si klube interneti”, deklaroi Rama.
Vlen të theksohet se urdhri i firmosur nga Ministrja e Arsimit, Lindita Nikolla, ndalon rreptësisht përdorimin e celularëve gjatë procesit mësimor, si nga nxënësit ashtu dhe nga mësuesit.
Urdhri hyn në fuqi menjëherë, dhe pritet që të zbatohet në vitin e ri arsimor që fillon më 17 shtator.
