Vijon ngujimi i disa studentëve në fakultetet e Tiranës. Tashmë, duket se protesta po merr tjetër përmasë, teksa sot po protestojnë edhe studentë të universitetit ‘Aleksandër Xhuvani’ në Elbasan dhe ‘Aleksandër Moisiu’ Durrës.
ELBASAN
Aktualisht në Elbasan po zhvillohet normalisht procesi mësimor, ndërsa një grup i vogël studentësh (15-20) kanë vijuar protestën.
DURRËS
Në Universitetin Aleksandër Moisiu, studentët kanë zhvilluar një takim të thirrur nga disa anëtarë të Këshillit Studentor. Ata kanë diskutuar për qëndrimin që do mbajnë lidhur me situatën e arsimit në përgjithësi. Ata kanë arritur në një vendim të përbashkët, të bojkotojnë procesin mësimor për të rrëzuar më pas Ligjin e Arsimit të Lartë.
“Universiteti është i yni, dhe rezistencën sigurisht që do ta bëjmë brenda mjediseve të fakulteteve.
Duke filluar nga ora 07:00, ditën e martë studentët e UAMD-së do të qëndrojnë brenda mjediseve universitare, si kolegët tanë në pothuajse gjithë vendin.
Procesi mësimor është shumë i rëndësishëm për neve, por akoma më e rëndësishme është një sistem cilësor i arsimit, kësisoj, studentët e UAMD duke filluar nga nesër nisin bojkotimin e mësimit, derisa qeveria të rrëzojë ligjin e arsimit të lartë dhe plotësimin e kërkesave tona.
Universiteti është i yni
Universitetin e bëjmë vet
Ligjet klienteliste nuk i pranojmë
Bashkohuni me studentët nesër në orën 07:00 pranë UAMD Pitallë, kampus 2”, thuhet në njoftimin e studentëve.
