Analisti i njohur Artur Zheji, deklaroi se kryeministri Edi Rama u shfaq mjaft i qetë në konferencën e djeshme për shtyp, kur foli për ngjarjet kriminale në vend.
Sipas tij, kjo ndodh sepse ai tashmë e ka siguruar mandatin e tretë, dhe se nuk ka njeri që mund ta prekë, apo t’i thotë se çfarë duhet të bëjë. Deklarata e Zhejit u bë ditën e sotme në emisionin ”Pikat mbi i” në News 24.
Ndër të tjera, Zheji vuri theksin edhe te opozita, teksa tha se qytetarët presin reagime të forta prej saj kur ndodhin ngjarje të tilla.
Artur Zheji: ”Ju thatë reagimi i shtetit dhe ishte Rama. Rama nuk është shteti, kryetari i mazhorancës. Duhet të reagonte opozita, prokuroria. Unë them që pamë një ramë në një konferencë të gjatë, të një njeriu që flet nga bunkeri mandati i tretë. Ai thotë askush nuk më prek mua, do të ndodhin gjëra, etj etj. Është një njeri që flet nga lart poshtë. Ky është reagimi i tij, kështu e lexoj.
Nëse themi që Rama kontrollon Gjyqësorin, këtë, atë, Rama krijon idenë e një njeriu të fuqishëm, të pamundshëm, ne e fuqizojmë, e absolutizojmë. Pra krijohen dy ekuacione diferenciale, të atij që qëndron lart, e ato poshtë, që lëvizin pa rregulla. Duhen gjetur të çara që ekzistojnë në sistemin pozitë, opozitë, në sistemin e një qeveria që nuk ka vetëveprim. Këtu ka nevojë për një ngritje, revolucion kulturor, të një kulture të re në bashkëjetesën me politikën. Kjo është mënyra më e mirë, për t’i thënë gjërat siç janë.”
