Një ngjarje e rëndë ka ndodhur në Deçan të Kosovës, ku një fëmijë 6-vjeçar ka mbetur aksidentalisht i vdekur. Sipas policisë së kosovës nuk dihet ende nëse pistoleta është shkrepur nga vëllai 8-vjeçar i viktimës apo është shkrepur nga vetë 6-vjeçari gjatë kontaktit me armën.
Sipas dyshimeve të hetuesve tragjedia ka ndodhur për shkak të pakujdesisë, ndërsa Gazeta Express ka mësuar se arma e përdorur ka qenë me leje.
Incidenti në fjalë ka ndodhur ditën e djeshme në fshatin Berliq të Deçanit, ngjarje nga e cila 6-vjeçari ka marrë dëmtime serioze në kokë.
Për këtë ngjarje ka folur edhe zëdhënësi i Prokurorisë së Pejës, Shkodran Nikçi i cili është shprehur për Gazetën Express se “prokuroria ka shkuar në vendin e ngjarjes së bashku me njësitë policore ku po merren masat e nevojshme, ndërsa pritet edhe raporti i autopsisë.”
I pyetur se si ka ndodhur vdekja e të miturit, Nikçi tha se prokuroria po pret akoma për raportin e autopsisë.
“Nuk dihen ende rrethanat si ka vdekur fëmija, jemi në pritje të raportit të autopsisë. Prokuroria e ka autorizuar Policinë e Kosovës, për marrjen e veprimeve të nevojshme në trajtim të këtij rasti”, shprehet Shkodran Nikçi.
Ndërkohë zëdhënësi i Policisë së Kosovës për Rajonin e Pejës, Driton Rugova është shprehur në lidhje me këtë rast:
“Policia është informuar rreth orës 19:20 se në spitalin e Pejës janë duke e sjellë një fëmijë, i cili është i lënduar. Policia ka dalë në spital për të kuptuar se si ka ndodhë rasti, dhe nga ekipi i spitalit kemi kuptuar së fëmija ka ndërruar jetë. Në vend të ngjarjes ka dalë edhe Prokurori. Trupi i pajetë i 6-vjeçarit është dërguar në Institutin e Mjekësisë Ligjore për obduksion”, ka thënë Rugova për Express.
Vitin e fundit nga arma e zjarrit kanë vdekur mbi 15 persona të moshave të ndryshme.
