Brazili nuk arrin të fitojë në ndeshjen e parë në grup ku përballë kishte Zvicrën. Ndeshja ka përfunduar në barazim 1-1 dhe pretendentët nuk treguan një formë të lartë për të bindur se ishin ata më të mirët, pasi në asnjë moment nuk treguan lojën e tyre. Selecao-s e nisën lojën me ritëm mjaft të lartë duke u hedhur në sulm dhe krijuan raste, me Paulinhon që nuk përfiton si duhet.
Nga momenti në moment pritej goli dhe këtë e bën Coutinho në minutën 20’, një supergol nga një distancë 25 metra.
Por pas golit Brazili e uli ritmin duke u munduar të kapë zviceranët në kundërsulm. Ekipi europian filloi të luante më lirshëm pas golit të pësuar dhe disa herë vë në vështirësi mbrojtjen e Selecao-s. Pas pushimit Zvicra nuk e ul ritmin duke parë se me sa lehtësi e kishte marrë Brazili dhe arrin të barazojë rezultatin me një gol të dyshimtë pas goditjes së këndit.
Ishte Zuber ai që shtyn Miranda-n përpara se të godasë me kokë nga shumë pranë portës. Ndeshja bëhet e hapur pas golit të barazimit dhe të dyja skuadrat luajnë lojë të hapur. Brazili arrin të krijojë disa mundësi por bën shumë pasime të gabuara dhe as ndërrimet e Tite-s nuk japin efektin e duhur.
