Një vrasje ka ndodhur pak para mesnate në fshatin Goriçaj pranë Divjakës në Lushnje. Një 42-vjeçar është vrarë me armë gjahu tip karabinë nga pronari i një lokali.
Mësohet se viktima është Judmir Stambolliu, ndërsa autori është identifikuar si Petrit Toromani.
Mësohet se viktima Judmir Stambolliu ishte problematik dhe kishte pirë në lokal, ndërsa më pas ai ka tentuar të përdhunojë gruan e pronarit të lokalit, gjë që ka çuar më pas vrasjen e tij nga pronari Toromani.
Ky i fundit nuk është larguar nga vendngjarja dhe më pas është arrestuar nga policia.
Viktima Judmir Stambolliu ishte ulur bashkë me 3 shokë në lokalin e autorit të dyshuar dhe po konsumonin pije alkoolike. Mësohet se lokali ku ndodhi ngjarja ishte edhe piceri, ku Petrit Toromani punonte bashkë me gruan.
Stambolliu ka nisur ta ngacmojë gruan e pronarit me fjalë dhe më pas ka tentuar që ta prekte atë.
Pas kësaj, mes dy bashkëfshatarëve ka nisur një konflikt, duke bërë që pronari i lokalit të marrë në banesë çiften, tip ‘karabinë’ (armën e kishte me leje) të cilën e ka zbrazur në drejtim të 42-vjeçarit.
Viktima ndërroi jetë rrugës për në spital.
NJOFTIMI I POLICISË
Në datën 11.12.2017, rreth orës 23:40 në Sallën Operative të Komisariatit të Policisë Divjakë ka ardhur një telefonatë se në fshatin Goriçaj ka ndodhur një vrasje. Menjëherë është nisur drejt vendit të ngjarjes grupi hetimor i cili ka konstatuar se: Në fshatin Goriçaj, Divjakë, në një lokal është qëlluar me armë gjahu shtetasi A.Ll, 42 vjeç, banues në Goriçaj, Divjakë, i cili ndërroi jetë rrugës për në spital.
Në kohë rekord policia e Divjakës zbardh ngjarjen dhe arreston në flagrancë autorin e dyshuar. Nga hetimet paraprake rezultoi se autori i dyshuar i kësaj ngjarje është shtetasi Petrit Toromëni, 42 vjeç, banues në fshatin Goriçaj, Divjakë, pronari i lokalit ku ka ndodhur vrasja. Dyshohet se vrasja ka ndodhur si pasojë e një konflikti të çastit për motive të dobëta. Policia po punon për zbardhjen e plotë të rrethanave dhe shkakut të ngjarjes.
