Valdet Rama ishte transferimi i Kukësit në këtë merkato janari. Ish-sulmuesi i kombëtares pasi mbaroi aventurën në Kinë, është rikthyer në Gjermani ku është stërvitur me ekipin e Schalke 04. Ai tashmë ka firmosur kontratën me verilindorët për 6 muaj me të drejtë rinovimi edhe për 1 vit tjetër.
Rama do të përfitojë 9 mijë euro në muaj pa përfshirë bonuset. Në prononcimin e tij për mediat, 31-vjeçari u shpreh:
“Për afro 5 muaj u stërvita rregullisht me Shalken. Normalisht pas aventurës në Kinë, dëshiroja të kthehesha në Gjermani. Kam qenë në bisedime me disa ekipe, por nuk arritëm të gjenin gjuhën e përbashkët.
Në kampionatin shqiptar e ndiej veten si në shtëpi. Kam luajtur për Kombëtaren dhe nuk kam pasur asnjë frikë të vij këtu. Arrita marrëveshjen dhe e ndjeva veten mirë. Vendosa me familjen që të nënshkruaj kontratën. Jam i lumtur që u realizua.
Falënderoj Kukësin që më dha mundësinë të vija këtu dhe do bëj maksimumin për synimet që ka klubi. Besoj se është një eksperiencë e re dhe e ndjej veten mirë dhe jam i gatshëm të jam maksimumin për këtë skuadër. Kukësi ka qenë gjithmonë lart në klasifikim. Shpresoj që të arrijmë qëllimin që ka klubi dhe të qeshim në fund të sezonit.
Rikthimi në Kombëtare? Me trajnerin Panuçi nuk kam patur asnjë kontakt. Kam ardhur të tregoj veten, të kem sukses. Për të tjerat nuk e kam menduar, çfarë do të vijë, le të vijë. Nuk e kam mendjen për momentin te Kombëtarja”, u shpreh Valdet Rama.
