Deputetja e LSI, Kejdi Mehmetaj, ka reaguar ndaj deklaratës së një dite më parë të ministres Spiropali, kur tha se “nga protesta ka mbetur një karikaturë”.
Ja çfarë deklaroi Elisa Spiropali
“Ajo qe ka mbetur nga protesta është karikaturë e protestës me angazhimin e LSI, PD dhe Sali Berishës. Janë disa segmente me tituj të pamerituar. Kjo është një shfaqje ekstreme e brutalitetit të një opozite pa lidership. Pjesa më e madhe e fakulteteve dhe universiteteve janë çliruar nga grupe që kanë marrë peng universitetin”.
Sakaq, gjatë mbledhjes së Komisionit Parlamentar të Medias dhe Edukimit, Mehmetaj e ka cilësuar si fyrje ndaj studentëve.
“Kjo është një gamë e madhe fyerjeje ndaj studentëve, edhe pse askush nuk e ka marrë mundimin t’i takojë e për t’i nxjerrë nga salla, se nuk janë në lartësinë e komunikimit imagjinar 3D të kryeministrit. Madje dalin me vendime qesharake, saqë shpikin salla të reja leksionesh, kur qartazi ligji përcakton se ku zhvillohet mësimi. Studentët etiketohen dhe denigrohen. Mendoni për dëmin që u shkaktohet studentëve, ndaj distancoheni nga qëndrimet kundër tyre dhe të merrni në dorë fatin dhe zgjidhjen e kësaj situate, duke hapur diskutim më të gjerë mbi arsimin e lartë”, përfundoi Mehmetaj.
