Edhe pse zhvilloi një sezon të mirë me Laçin dhe e ktheu në ekipin që luante lojën më të bukur në Superiore, Gentian Mezani vendosi që të largohet nga drejtimi i klubit p-ër arsye personale. Kjo bëri që kurbinasit të hidheshin menjëherë në sulm për të gjetur zëvendësuesin e tij, i cili do ti drejtojë në Europë.
Do të jetë Besnik Prenga trajneri i ri i skuadrës kurbinase i cili do të drejtojë Laçin fillimisht në turin e parë kualifikues të Europa League dhe më pas në sezonin e ri të Kategorisë Superiore. 49-vjeçari nga Mirdita nuk ka shumë eksperiencë në stol, por karriera e tij si futbollist ka qenë me të vërtetë e pasur.
Besnik Prenga është edhe babai i mbrojtësit Herdi Prenga i cili aktualisht është pjesë e skuadrës së Inter Zapresic në kampionatin kroat. Për një periudhë të shkurtër Besnik Prenga ka drejtuar dy skuadra në kategorinë e dytë të futbollit kroat fillimisht Hrv Dragovoljac dhe më pas Nk Lucko, ndërsa ka qenë edhe trajneri i skuadrës së 19-vjeçarëve të Lokomotivës së Zagrebit me të cilët u shpall dhe kampion.
