Pas dështimit në Botërorin e Rusisë, kombëtarja e Argjentinës ka shkarkuar trajnerin Jorge Sampaoli dhe akoma nuk është gjetur zëvendësuesi i tij. Disa emra të rëndësishëm janë përmendur që do të marrin drejtimin e “Albiceleste”, por deri tani nuk ka pasur asgjë konkrete.
Por një lëvizje që ka ndodhur te kombëtarja e Kolumbisë të bën të besosh se do të jetë pikërisht Jose Pekerman njeriu që do të udhëheqë Argjentinën. Tekniku 59-vjeçarë në mënyrë të habitshme ka lënë drejtimin e Kolumbisë, pasi përfaqësuesja e drejtuar nga ai zhvilloi ndeshje mjaft të mira në Kupën e Botës. Lajmin për shkëputjen e kontratës mes tyre e ka konfirmuar vetë Federata Kolumbiane e Futbollit.
Për Pekerman do të ishte një rikthim në stolin e Argjentinës pasi ai e ka drejtuar gjatë viteve 2004-2006. Mendohet se ai do të marrë detyrën e re në muajin nëntor kur përfundon edhe kontrata e përkohshme e trajnerit aktual Lionel Scalonit.
Ndërsa Pekerman u largua, Kolumbia ka në mendje dy emra për të marrë vendin e tij, është Gerardo Martino, i cili ka drejtuar për një sezon edhe Barcelonën. Ndërsa emri tjetër është ai i Jorge Sampaolit, i cili u shkarkua nga Argjentina vetëm pak muaj më parë pasi dështoi në Botëror. Por Sampaoli është një trajner mjaft i aftë dhe këtë e ka treguar kur ka drejtuar Kilin, apo edhe Sevillan.
