Një vit më parë, Wuhan ishte epiqendra e pandemisë globale COVID-19, ndërsa sot është kthyer në ‘epiqendrën’ e fastave.
Klubet e natës, baret e restorantet e qytetit që dikur ishte bosh, sot festojnë sikur të mos kishte ndodhur asgjë. Ringjallja e Wuhan-it, është ajo që shumë shtete të botës dëshirojnë, pasi SHBA-të dhe Europa, janë ‘pushtuar’ nga COVID-19.
Qyteti prej nga doli virusi, filloi një bllokim total nga 23 janari deri më 8 prill pas shpërthimit të parë dhe nuk ka raportuar një rast të ri të COVID-19 që nga fillimi i majit. Më parë këtë muaj, qyteti madje nisi një video promovuese për të tërhequr turistë.
Që në shfaqjen e tij, koronavirusi ka prekur deri tani mbi 75 milionë vetë në shkallë globale dhe ka shkaktuar më shumë se 1 milion e 677 mijë të vdekur, sipas statistikave të Universitetit Johns Hopkins.
Shtetet e Bashkuara kryesojnë për nga numri i të infektuarve dhe viktimave, me afro 17.5 milionë të diagnostikuar me koronavirus dhe mbi 313 mijë të vdekur, pasuar nga India dhe Brazili.
Në ditët në vazhdim, ndërsa në një pjesë të madhe të botës fillojnë përgatitjet për festat e fundvitit, autoritetet po bëjnë thirrje për shmangien e grumbullimeve familjare që mund të shtojnë rrezikun e infektimit.
