Futbollisti i kombëtares shqiptare, Astrit Ajdareviç, është bërë protagonist në ndeshjen që luajti ekipi i tij AEK-u me Dinamon e Kievit një natë më parë në kuadër të Europa League. Edhe pse vinte nga dëmtimi, arriti të gjente rrugën e rrjetës vetëm 30 sekonda pasi u aktivizua, duke i dhënë një barazim mjaft të rëndësishëm grekëve. Në një intervistë për “Supersport”, Ajdareviç është shprehur:
“Kam pasur një dëmtim të vogël, kam zhvilluar vetëm një stërvitje. Luajta dhjetë minuta, nuk kisha kohë që të tregoja edhe aq shumë, por arrita të shënoja gol. Është kënaqësi të ndihmoj ekipin dhe veten time. Kemi shanset e mira. Jemi të vetëdijshëm se jemi ekip i mirë, luajmë futboll dhe kemi lojtarë me cilësi individuale. Kjo është fazë me eliminim, nuk kemi kohë të trembemi, por vetëm të shkojmë për fitore në Kiev”.
Ajdareviç nuk ka pasur një rrjedhshmëri në këtë sezon dhe është aktivizuar shumë pak tek AEK-u, por tani pasi la dëmtimin pritet që të ketë hapësira më shumë. Kjo paraqitje e mirë për mesfushorin është edhe një sinjal për trajnerin e kombëtares, Panuccin, përpara miqësores së 26 marsit me Norvegjinë.
“Trajneri Panucci e di kush jam, e di çfarë kam bërë në takimin e parë në Turqi. Nëse do ti nevojitet një lojtar me cilësitë e mia do të më thërrasë. Mund të jap shumë për Kombëtaren, unë e pres dhe shpresoj. Pastaj varet si luaj edhe me AEK-un, nëse luaj nëse jam i rëndësishëm atëherë do të më grumbullojë edhe Kombëtarja. Megjithatë ka kohë deri në mars, edhe pse unë shpresoj që do të jem në listën e trajnerit”.
Astrit Ajdareviç foli edhe për rivalët e Kombëtares në Ligën e Kombeve, ndërsa zbuloi se ëndrra e tij është që me Shqipërinë të luajë në Kupën e Botës.
“Të gjitha ndeshjet janë të vështirat, nuk ka më përballje të lehta. Megjithatë ne e dimë që Shqipëria ka skuadër të mirë. Nuk i njoh edhe aq mirë Izraelin dhe Skocinë, por normalisht edhe ato luajnë futboll të mirë. Këto vite që kam për të luajtur futboll do ti jap për Kombëtaren time dhe për shtetin tim, ndërsa dëshira ime më e madhe është të shkojmë në kampionatin Botëror”.