Babai i yllit brazilian Neymar ka folur rreth kalimit të tij tek PSG dhe ëndrrës së fitimit të ‘Topit të Artë’. Ai është shprehur se nuk ka qenë shumë dakord për këtë kalim dhe se dëshironte qëndrimin tek gjiganti spanjoll, Barcelona. Ai kishte marrë një vendim dhe ne e mbështetëm normalisht, tani sfida e tij është të ndihmojë parisienët të fitojnë ligën e Kampionëve.
“Nëse Neymari ëndërron Topin e Artë, duhet të qëndronte tek Barcelona”. Kjo është deklarata e bujshme e babait të Neymarit i cili në një intervistë për “Telefoot” ka zbuluar se nuk ka dashur që djali i tij të largohej nga katalanasit.
Babai i 25-vjeçarit tregon se si Barcelona tentoi ta bindë atë të qëndrojë në “Camp Nou”, por braziliani tashmë kishte vendosur.
“Unë kam qenë ai që kam dyshuar për këtë deri në momentin e fundit. I kam thënë se më e mira është që të qëndrojë në Barcelonë, por ai dëshironte të rrezikonte. Ishte e vështirë, por Neymar dëshironte këtë sfidë të re dhe natyrisht që të gjithë e kemi mbështet”, tha fillimisht babai i Neymar.
“Synimet? Neymar është motivuar edhe më shumë nga fakti se mund ta ndihmojë PSG-në ta fitojë Ligën e Kampionëve. Nëse Neymar meriton ta fitojë “Topin e Artë”, atëherë do ta fitojë, por nuk besoj se është i obsesionuar pas këtij çmimi. Nëse do ta dëshironte, do të kishte qëndruar në Barcelonë”, shtoi ai.
“Ata u menduan ta bindin, por ai tashmë kishte vendosur. Neymar është i lumtur në PSG, ka nënshkruar kontratë pesë vjeçare, kështu që ka kohë pesë vite për ta fituar Ligën e Kampionëve me Parisin”, theksoi mes tjerash babai i brazilianit.
