Lozana do të tërheqë edhe të mërkurën vëmendjen e shqiptarëve, pasi pas çështjes së titullit të Skënderbeut, tani do të hidhe shorti i Ligës së Kombeve. Me fillim në orën 12:00, Kombëtarja shqiptare o të njohë kundërshtarët e saj, në këtë kompeticion që organizohet për të parën herë. Liga e Kombeve është formati i ri i UEFA-s nga i cili mund të sigurosh biletë për në Europianin e vitit 2020 dhe pasi janë ndarë vazot dhe ligat mbetet për tu përzier goglat që secila Kombëtare të mësojë rivalët.
Në bazë të renditjes së UEFA-s do të bëhet edhe ndarja e grupeve, ku kuqezinjtë do të rreshtohen në Ligën C. Nuk do të ketë asnjë përplasje ballkanike për Shqipërinë, pasi Serbia dhe Greqia janë në të njëjtën vazo me kuqezinjtë, po ashtu edhe Norvegjia. Kundërshtarët e mundshëm të Shqipërisë së Christian Panuccit janë Hungaria, Rumania, Skocia dhe Sllovenia që janë në vazon e parë të Ligës C. Po ashtu kuqezinjtë mund të përballen edhe me Malin e Zi, Izraelin, Bullgarinë dhe Finlandën që janë në vazon C dhe Shqipëria mund të ketë përballë edhe Qipron, Estoninë dhe Lituaninë që janë tre skuadrat e vazos së katërt në Ligën C.
Gjatë hedhjes së shortit skuadrat e Ligës C do të ndahen në tre grupe me nga katër skuadra dhe një grup me tre skuadra. Katër fitueset e secilit grup ngjiten në Ligën B ndërsa ekipet e vendeve të fundit zbresin në Ligën D. Kosova bën pjesë në vazon e katërt të Ligës D që është liga më e dobët. Në Ligën A bëjnë pjesë 12 Kombëtare ato më të mëdhatë në Evropë Gjermania,Portugalia, Belgjika ,Spanja, Franca,Anglia,Zvicra ,Italia, Polonia,Islanda, Kroacia dhe Holanda. Këto ekipe do të ndahen në tre grupe me nga katër skuadra. Edhe në Ligën B janë 12 ekipe të nivelit të lartë.
