Gjykata e Tiranës ka shtyrë dhënien e vendimit për Ervis Martinajn. Vendimi do të jepej sot, por është shtyrë pas provave të reja të paraqitura sot nga prokuroria.
Prej një muaji, Martinaj ka qenë nën masën e sigurisë “30 ditë qëndrim në burg”. Ndërkohë, mësohet se Prokuroria ka siguruar tashmë prova të reja për vrasjen në ish-Bllok, që rëndojnë pozitën e një prej protagonistëve të sherrit të 4 tetorit.
Prokuroria ka zbuluar biseda në aplikacionet Whatsapp dhe Telegram të Martinajt me miqtë e tij pak minuta para ngjarjes, ku mbeti i vrarë Fabian Gaxha. E pikërisht me viktimën por edhe disa miq të tjerë duket se ka komunikuar 36-vjeçari Martinaj, raporton BalkanWeb. Gazetarja Lala duke cituar burime nga prokuroria, raportoi se kur Martinaj është paraqitur në lokalin Monopol iu ka kërkuar miqve të afroheshin dhe të paraqiten aty të pajisur me armë.
Pra, sipas prokurorisë nuk ka qenë takim i rastësishëm siç ka thënë Martinaj në dëshminë e tij dhe sherri nuk ka pasur si shkak ngacmimet e këngëtares Elvana Gjata, por konflikte të mëparshme.
